橙遊之二【Jens Lekman與七個小矮人】

amste_002_b

應該是說有緣吧,竟然又是幸運地,我到訪Amsterdam的時間剛巧也是Jens Lekman tour到Amsterdam的時間,所以終於可以如願,看到他的現場演出!

Jens Lekman表現地點是Paradiso是Amsterdam內其中一個最重要的表演場地,翻看Wiki,基本上大部份神級樂團如Pink Floyd到U2到Talking Heads到The Clash都曾在此開show。Paradiso是由19世紀的教堂改建內部而成,地點原來就在市中心,踩踩單車忽然間就到了。

泊好車便走到Paradiso門前排隊,當晚有不少英國人在場,英國口音四處飛。Paradiso其中一最頂癮地方係入場睇show 係一定要做佢member,即係無端端要畀多3歐羅。當晚其中一奇特地方係在台前通常是跳舞企位的地方,竟然放了桌子與椅子,那種圓桌圍了兩三張椅子那樣子,讓我聯想起歡樂滿東華或是那些名星間的頒獎禮或是酒會,幾騎呢。

當晚另一開心大發現就係荷蘭人真係特別高,最近看報導知道原來他們比德國人更高,是全歐洲最高民族,平均183cm(注意,係平均,即係冇講性別,即係男女都平均183)。原來身旁的那位大概有185cm的荷蘭友添飯茄墳在荷蘭standard也只是平均甚至是矮,因為在場人士全都比我至少高半個至一個頭,呢種體驗係even在挪威都冇的。當我戲言全場矮過本人的應該不超過十人,而呢個時候身旁的添飯茄墳便說了一個本人認為是他的代表作的笑話︰「我估全場有六個人矮過你,因為there are 7 dwarfs」….

我也問佢咁響荷蘭矮真係好慘,響學校一定做人笑柄,佢當然話,係呀,通常都係架。矮人真無奈。

說完笑話回到音樂部份,當晚有Khaela Maricich (The Blow) 當support act,
也許是under budget 的關係,沒有live band,孤身上陣,不過頗有Jarvis Cocker 上身感覺,也就是極為神經質的那種表演者。

到Jens Lekman,原本擔心他的這次tour會是小型tour,不會帶太多人一齊tour,因為我鍾意佢有接近成個orchestra backup的arrangement。除了唱了幾首新歌,大部份還是上張專輯的歌曲。他的現場也真是十分掂,每首歌都有適當的新點子及編曲,而且搞笑o既佢亦原來十分鍾意配合動作來製造效果,總之好好睇。這個網站有一些很好的相,去睇下

amste_002

基本上第二日的行程就是踩單車在市中心略略走走,認識一下市中心大概係點,當然,中間亦不乏坐低抖抖飲杯咖啡食個lunch飲杯啤酒咁。夜晚返佢屋企吃晚飯然後夜晚就是去看了這演唱會。看完演唱會出來,天已黑,發現夜晚的Amsterdam一樣咁熱鬧,尤其一出來我們便身處Korte Leidsedwarsstraat這條全是酒吧的街,進入了一間添飯茄墳平時去開的Pub Café de Spuyt,格調奇好,正在播【OK Computer】,音樂音量剛剛好,不會嘈聽不到人講咩。啤酒種類亦多到驚人,當然有聞名已久的大量不同Belgian Bier。果一刻我先明白難怪身旁這位荷蘭男仔會成為一個酒鬼。(不過回來google 一下,十分搞笑,原來他們有兩隊球隊,一隊排球一隊藍球,將酒吧同sport clubs 結合,十分勁。)就咁大概坐到一點左右,依然係踩單車返歸。

(再次提醒,Flickr有更多相)


橙遊之一【踩單車能製造快樂】

最近是什麼時候踩過單車?我自己也記不起,或者對上一次已是四年前在Copenhagen哥本哈根時踩了。沒有想過,竟然來到Amsterdam,踩足六日單車,風雨不改,實在犀利。

不禁覺得踩單車真係一樣令人愉快的活動,沒有講笑,單車比步行來得寫意,那種風徐徐地吹的感覺很自由,有d似雀仔,總之令到人心情十分爽快,冇花冇假,我真係一路踩一路笑,連通常(不是通常,一直)踩在我前面的添飯茄墳都話畀我知,哇,我擰轉頭見到你不斷傻笑喎。

係呀,踩單車真係令人放鬆,好過食咩抗抑鬱藥。所以又不禁覺得,荷蘭人之所以長居什麼最快樂國家排行榜,無他的,首要原因未單車囉。諗下,返完工再累再唔開心,踩返半個鐘單車,戻氣都全消啦。至少我咁覺得。

amsr_001b

不過,踩單車亦要講地點的,Amsterdam成為世界上的單車城市也真係實至名歸,何解?首先,地夠平,基本上踩得好興鬆,唔同,比如,Oslo,Oslo十分多斜坡,好似上我住所的那個長命斜,便踩死人囉。其次,Amsterdam實在太多好睇的architectures,真係一路踩一路睇,不是說笑。

我與添飯茄墳都多少相信荷蘭裏是單車比人多的,因為單車真是多到有點嚇親你。不過咁,國有國法家有家規,要響Amsterdam 踩單車都要留意一d野,首先,市中心有極多討厭的遊客響度阻你去路(係呀,最憎遊客:P),不太好踩;第二,Amsterdam的單車通常會較高,即係你冇六呎三都唔可以踩到地果種,點解?因為咁樣對隻腳好d 喎,咁點算?每次停時未搵街度果d 小階梯停,咁未易停囉。仲有,佢地興用腳brake,即係唔係用手按果d,不過我又真係鍾意腳brake多過手brake。最後,就係轉左轉右記得用後手示意,本人其實自從在Copenhagen 見到要咁做已覺得十分有型,所以好似添飯茄墳細妹提我,話有一D盲毛,當然尤其係遊客啦,會唔做手勢,咁就會Botsing(即係碰撞),所以佢就試過幾次botsing,都係呢d 盲毛害的。

所以呢,基本上,除了來回機場要坐火車外,我係冇坐過任何交通工具,每日踩單車來回Amsterdam與Diemen,十分爽!哈哈。


橙遊之零【由零開始認識橙國】

我一直以為,(別笑我無知),荷蘭是歐洲一大國,大概與挪威差不多那麼大,(我讀history,我清楚知道荷蘭所在地),以為阿姆斯特丹比Stockholm大……原來,真的很無知,荷蘭原來比挪威少了幾個碼,原來荷蘭是如此的細小,但點解你容得下Van Gogh(梵高), Piet Mondrian,M.C. Escher 到整個Philip 及ING?你的橙色國家隊點解可以比挪威瑞典丹麥勁咁多倍?荷蘭橙荷蘭野點解會咁出名?………

其實與Amsterdam大概是有緣無份,兩次在Amsterdam 機場轉機,再一次擦身而過,差點兒便會到訪當地。終於,趁這個空檔期,我急不及待,跑到阿姆斯特丹,還一個心願。

當然,促使這次旅程其中重要因素是交了就住在阿姆斯特丹旁Diemen的添泛茄墳這位荷蘭好友,一切算是無心插柳,竟然住在他的家與他家人生活了六天,竟然踩足六日單車,竟然就這樣展開了阿姆斯特丹七日六夜旅程。

總共四百張相upload 在flick,歡迎前往

陸續有來…

(是時候要為去個的城市都做一個系列,之前首爾的要重新結集。)