看著為駕車人士而設的荷蘭導航系統公司Tomtom找John Cleese合作的新廣告，真係睇到騎騎聲。當然，這次沒有之前搵Starwars 如Yoda等角色的廣告執行得咁好，甚至六段片中有數段都處理得好一般。不過咁，當係尊重老人家，唔好要求咁高，令到我一樣笑得騎騎聲的有兩段片，一係Selfish Bastard同John Cleese likes Traffic Light兩段，哈哈，一貫英式absurd喜劇或是Faulty Towers或是Monty Python 風格。
從來喜歡睇Morrissey的訪問，佢講野直接大膽，真真正正有果句講果句；亦勁在佢講野真係有佢的想法及不是瘋人瘋語，雖然每次本人都不甚認同，但至少我都睇得開心。但估唔到原來Morrissey都會冇唱片合約，他剛接受Pitchfork訪問，原來佢新碟已寫好，只待有唱片公司肯畀錢錄佢地，唱片便成事。其中佢談及internet如何破壞music industry，另一點搞笑非常的係佢點樣寫U2
“U2 have an enormous Star Wars set with drumsticks that light up northern Africa, and a sound system that would drown out an earthquake. I can’t compete with that.”
不過咁，Morrissey犀利的係在好似好差的情況下佢都沒有老羞成怒，仍然能夠自嘲，哈。
Morrissey Talks Label Troubles, Glastonbury
有時，坦白講，我真係唔明好多香港人個腦諗咩，又或者佢地用咩野思維去諗野，又會令我諗究竟係我有問題定佢地有問題。示威者上天橋示威，辦工警員因為失足跌死，其實顯然當中係冇因果關係，失足擺明係意外，點解會搞到要話示威者搞事累死警員？慘劇還慘劇，道理還道理哇。
講logic，好，當然，我明白Facebook的【沉重哀悼墜橋殉職警長 強烈譴責陳偉業癲倒是非】的Logic，因為陳偉業都用了一個幾乎冇Logic的遺責︰「人民力量陳偉業表示，周一嶽如果肯與該名示威男子見面，警員失足墮橋的慘劇可避免。」見示威者->冇示威->警員唔會死。好似合理，但其實唔合理，因為都係冇直接因果關係。所以癲倒是非的朋友，用同一個幾乎係莫須有原則，冇陳偉業幫示威者->冇示威->冇人死，可以叫做以牙還牙，卑鄙鬥下流，愚昧鬥無知。
撇除任何政府社會因素，其實問題好簡單，亦有人已提出了，警員的失足好明顯係冇安全措拖之過。要反思的，應該係點解爬高爬低我地的尊敬警員沒有任何保護。係咪？
其實意外係冇任何因果關係，即係你不會因為消防員因為救火殉職而話引起火警的人係殺人犯害人精。當然，暗訝底，我們明白的，警察是無需要危害自己條命去保護市民，好似八號風球到海灘游水而又浸親的人，我是贊成警察係唔需要救的。每個人都有呢Ｄ（不）文明人道諗法，呢Ｄ就真係價值觀問題，意見分岐的話講多十年都冇結果的了。若然你係認為市民唔應該示威唔應該做「危險」行動的，咁你有你睇法，我吹你唔脹，但唔好將警員意外逝世變為示威者要負上全部責任。(當然，當你係死者家屬又或是示威當事人，又或是好投入好感情用事去睇呢件事，我明白有人會將責任推上示威者身上。無可否認，示威者係事件的「起源」。但呢類不盡合理的「內疚」或「怨恨」，除了係當事人因為突然的巨大情感而變成合理化外，事外人，用邏輯諗的話，就真係唔該唔好一樣感情用事亂去指責。）
你都唔會因為食飯啃親就話飯係邪惡以後唔吃飯繼而遣責叫你食飯的呀媽或老婆啦？
從來我都是愛懷舊，Floopy 唔捨得掉，MD唔捨得掉，總覺得它們有一天可成為我的一個art project。嗯，是的，我不是愛那些超舊的東西，但喜歡一些舊但設計簡單的東西，總特別可愛。這也是有關於回憶的，或多或少，但在我來說其實更多是去用想像去回想舊時的歲月，為什麼人總是要牽著走跟著生活流，買新棄舊，很累呢。
說回正題，蠻簡單，其實就係計算用幾多Floppy先可以裝到呢個世代的software，結果係
46 disk for iTunes 8.02
358 disk for Adobe Photoshop CS4
1760 disk for the Sims 3
12 disk for Firefox 3, 36 disk for Firefox Add-ons
張ＰＯＳＴＥＲＳ 好靚呢。
哈哈，睇到呢個網上火速走紅，來自Egypt的「Never say no to panda」廣告實在叫我笑到騎騎聲，睇一次笑一次。鍾意廣告首先因為佢夠absurd，熊貓同人對峙果d「定鏡」實在捕捉得太好。然後本身利用熊貓鈍蠢慢o既形象去對比呢個火爆熊貓，就更係冇得頂，妙在保留熊貓的慢及弄重，睇到佢咁勞氣火爆真係笑死。幾個版本，最鍾意其實先係辦工室，然後醫院，再係supermarket，timing 最唔好係廚房。
日本漫畫是養大我的養料，由細睇到大，很多的畫畫動力、想像力及小時候的瘋狂空想都是來自日本漫畫。這幾年對漫畫的熱情變淡，基本上幾乎沒甚看漫畫那樣子。這幾天突然知道安達充又有新作《Q&A》，一下子那種想看漫畫的心情回來，看哪一本，嗯，就選了高橋留美子的《境界之輪迴》，這本在香港沒有成功買到的漫畫，讓我重拾小時候看漫畫的感覺。
事先聲明，我真係好鍾意睇高橋留美子，亦基本上(除了《犬夜叉》三十期打後未睇外)，我應是幾乎看過了她所有的作品，《一磅的福音》、《p之悲劇》、《山T女福星》、《人漁森林》、《亂馬1/2》、《相聚一刻》及其他短篇集……基本上每一本我都是十分喜歡，當然，尤其是《山T女福星》，我真係睇到笑到反肚，那些瘋狂式無厘頭又戲劇化的劇情真是好笑到不得了，真係記得自己在床上看山T時如何笑到輾來輾去。
《犬夜叉》對我來說是高橋留美子的一個嘗試，首次擺脫單元式故事(《人漁森林》也接近單元式)，以極古老的章回手法來寫故事，我感覺真的像在看日本版的西遊記一樣，所以可以拖得那樣長。
相反，亂馬或山T都是以單元形式，採取一直不斷增加新人物的方法來延續故事，而這次，《境界之輪迴》便終於再次採取同樣的方式，終於是一樣帶有無盡的無厘頭幽默感，讓我不斷追看，一樣不斷笑到騎騎聲。呀，高橋留美子你真好野。
真沒想過她會再畫這樣的故事，《境界之輪迴》基本上延續了亂馬或山T的風格，依然係鍾意將男主角或女主角其中一方面單戀對方(基本上高橋留美子每一個長篇都係有呢個元素)；有眾多情敵出現，而主角本身又有人痴戀；有無良老豆(山T中龍之介同佢老豆條線真係笑死人，誇張到冇人有)；而且依然充斥著舊有的笑話，如最深刻的莫過於那個戰死士兵的故事，實在是將舊有笑料重新包裝，但依然爆笑。
我都自問點解咁鍾意高橋留美子，我諗，高橋留美子一直在說故事的思路上是比其他作家來得清楚分明，還記得《P之悲劇》那些黑色幽默的小品，都是因為她那種流暢的說故事技巧而變得十分好睇。當然，佢O既幽默感都係冇得頂啦。
未睇《境界之輪迴》o既大家快睇咯。
愛層層疊，愛Tetris，瑞典藝術家MICHAEL JOHANSSON愛在公眾地方用ＬＥＧＯ鮮艷顏色的現成「積木」來與本身環境產生強烈背景，像２０１０年最新大型作品【Self Contained】，十分趣緻。
